O venres 14 de marzo, celebrarase, ás 20:00 horas, na Asociación Évame Oroza, a inauguración da exposición Paisaxe interior, do artista galego Xulio García Rivas. No acto, Xulio estará acompañado polo escritor e amigo Antonio García Teijeiro, quen participou ademais no catálogo creado para esta mostra.

Paisaxe interior  reúne parte da obra máis recente de Xulio García Rivas, unha selección de pezas de mediano e gran formato realizadas en tinta chinesa e acrílico sobre lenzo. As dimensións dalgunhas das pezas xogan un papel destacado nesta proposta de carácter inmersivo coa que se tenta conectar ao espectador co seu mundo interior, a través da interpretación da paisaxe que se fundamenta, na memoria, a imaxinación, a intuición, a emoción ou o azar.

ler máis

O xoves 13 de marzo (20:00 horas) a asociación fará unha homenaxe ao actor vigués Antonio Durán Morris, en recoñecemento a toda a súa carreira e o seu papel fundamental na historia cultural da cidade. No acto, aberto a todas as persoas interesadas, Morris estará acompañado de Manuel Manquiña, Fernando Fernández Domonte e Xosé Cermeño.Tras a homenaxe, está prevista un viño e petiscos co actor para aquelas persoas que desexen acompañalo. O prezo da cea é de 20 euros por persoa e será no restaurante Casa Moncho, situado no número 24 de cálea Dr. Cadaval. Para asistir ao ágape é preciso inscribirse no correo Este enderezo de correo está a ser protexido dos robots de correo lixo. Precisa activar o JavaScript para velo., pois o número de prazas é limitado. Podedes facelo ata o día 12 de marzo.

O martes 11 de marzo (20:00 horas) presentamos o libro de relatos «En aquellas calles dibujé mis pasos», de Carmen Pereiro-Oliveira, no que cada relato conta historias cargadas de humanidade, sensibilidade e unha profunda conexión coa contorna. No acto participarán, ademais da autora, a escritora Clara do Roxo e o editor Xabier Romero. Na presentación contaremos cunha exposición das obras da cuberta e do interior, do artista Nito Pereiro-Oliveira, cuxo traballo foi fotografado por Alberto Pereiro Lueiro «Holly».

ver mais

O xoves 6 de marzo, ás 20:00 horas, a artista Gabriela Cánaves Miñones ofrecerá unha charla sobre o seu proxecto de performance PePa  que nos servirá para achegarnos ao mundo e práctica da performance. A charla, aberta a todo o público, será tamén a presentación do Laboratorio Intensivo de Performance Arte que a artista galego arxentina desenvolverá no local da asociación os días 19 e 20 de marzo de 17:00 a 21:00 h.

Para participar no laboratorio é preciso realizar unha inscrición previa, que podedes facer a través do correo Este enderezo de correo está a ser protexido dos robots de correo lixo. Precisa activar o JavaScript para velo.. O prezo do laboratorio é de 50 euros para as persoas non asociadas e 40 para as asociadas.

Queremos convidarvos a que nos acompañedes o martes, día 4 de marzo, ás 13:00 horas cando recibiremos no barrio a visita dos Merdeiros, que farán unha parada no local da asociación para repoñer forzas tras percorrer as rúas do Casco Vello Alto. Por suposto, podedes vir entroidadas e entroidados!