Évame

Oroza

Exposición KOYAANISQATSI: TEATRO DE LA MEMORIA

O venres 4 de outubro terá lugar a inauguración da exposición Koyaanisqatsi: Teatro de la memoria, que recolle carteis, fotografías dalgúns espectáculos obra de Isabel Muñoz (Premio Nacional de Fotografía) e obxectos desta compañía afincada en Madrid, pero moi vencellada a nosa cidade.

A compañía de teatro Koyaanisqatsi (“vida fóra de equilibrio”) na lingua dos indios hopi, naceu en Madrid en 1985. Estreouse cunha montaxe titulada Sobre la noche, dirixido por Anne Serrano, fundadora dunha compañía que desde entón “non deixou de mesturar a súa visión ácida da realidade cun minucioso rescate da memoria como argumento teatral e vital”. En xullo de 1987 presentou no Auditorio da Caixa de Aforros de Vigo o seu segundo espectáculo, Cabaret de la Memoria, de Alfonso Armada, que se converteu en director da compañía. Desde esa data subiron ás táboas Dos monólogos náuticos (1988), formado por La caja de Pandora, de Pilar Maya, e La balsa de la Medusa, tamén de Alfonso Armada, autor de todas as pezas que seguiron: La edad de oro de los perros (tamén estreada, o 11 de marzo de 1989, en Vigo), Amor mortal (1990), Sin Maldita Esperanza (1994), Carmencita jugando (1995) e El alma de los objetos (1997, premio Ollo Crítico de Radio Nacional de España).

A inauguración, prevista para as 20 horas, terá unha cita previa, ás 19.30, ante o antigo teatro/cinema Rosalía de Castro, onde Koyaanisqatsi estreou algunhas das súas obras máis afamadas e controvertidas. Lembrando a  El alma de los objetos e en certa medida ao frautista de Hamelín, e seguindo os toques dos taborileros da ETRAD (Escola Municipal de Música Folk e Tradicional), seguiremos os seus pasos ata Évame Oroza . Tras a benvida do presidente da Asociación Évame Oroza, Xabier Romero, intervirá o pintor Darío Basso, comisario xunto a Alfonso Armada dunha insólita mostra que foi idea deste pintor vigués. A continuación, o ex director da Escola Superior de Arte Dramática de Galicia, Ricardo Solveira, que encarnou o papel do Pallaso en Cabaret da Memoria, interpretará, acompañado do pianista Nicasio Gradaille, tres temas desa función. Seguiralle a actriz Anne Serrano, que interpretará parte do espectáculo no que quizá foi máis ela que nunca, Carmencita jugando.

XIII edicion de CON BARQUEIRA E REMADOR

Un ano máis Évame Oroza será sede auxiliar do Obradoiro Internacional de Tradución Poética “Con barqueira e remador”, que desde o 30 de setembro, e ata o próximo 5 de outubro celebra a súa décimo terceira edición na illa de San Simón, baixo a coordinación de Yolanda Castaño.
No acto que se celebrará no local da asociación o xoves 3 de outubro, ás 19:30 horas poderemos escoitar as poetas convidadas que nesta ocasión son: Radu Vancu, de Rumanía; Petar Matovic, de Serbia; Nadia Mifsud, de Malta; Andrea Cote, de Colombia; Martí Sales, de Cataluña, y Jesús Castro Yáñez, de Galicia.

Estrea do documental MAR, SOL, VENT de Xacobo Sanmartín

O mércores 2 de outubro (20:00 horas) Évame Oroza acollerá a estrea do documental Mar, Sol, Vent,  realizado por Xacobo Sanmartín, artífice da produtora Madre Films situada no Casco Vello Alto.
“Mar, sol, vent” é un filme onde non só documéntase a rehabilitación das Salinas da Concepción de Menorca, senón que explora como o espazo arquitectónico pode contar historias e conectar ás persoas coa súa contorna. A través de técnicas artesanais e un enfoque multidisciplinar, revívese unha tradición que evoca recordos e protexe a biodiversidade. Do mesmo xeito que no cinema, o espazo e o tempo fusiónanse, convidando aos espectadores a reflexionar sobre a súa relación coa paisaxe mediterránea e a súa historia, creando memorias emocionais que transcenden o visual. Esta curtametraxe documental, chea de beleza e sensibilidade, ten unha duración de 35’:40’’ e poderá verse por vez primeira no noso local.

Licenciado en Comunicación Audiovisual e cun Máster en Arte e Novas Tecnoloxías, Xacobo Sanmartín (Vigo, 1978) dedicou os últimos 20 anos á creación e desenvolvemento de proxectos cinematográficos, colaborando con numerosos medios de comunicación nacionais. Inicia a carreira como documentalista coa curtametraxe “I love Teis” (2005), de 5 minutos de duración, que foi seleccionado para o Festival Internacional de Documentais “Play-Doc”. A súa primeira longametraxe como director, “Un mar de Pedra”, explora o proceso creativo do escultor Manolo Paz e foi seleccionado para a  Competición Oficial do Play-Doc (2010), así como no Festival Internacional de Cine de Ourense e Cineuropa.

Charla aberta entre LAURA ITURRALDE, DIN MATAMORO e MARÍA LADO: A LUZ

Finaliza, , o ciclo Charlas Abertas  no que artistas de diferentes disciplinas conversan no local de Évame Oroza con María Lado como moderadora.

O venres 27 de setembro terá lugar a última sesión de Charlas Abertas, na que sentarán a conversar a iluminadora Laura Iturralde e o pintor Din Matamoro. Ambos talentos están unidos, polo traballo coa luz e a sensibilidade visual que demostran nas súas creacións.  Iturralde ten unha longa experiencia en teatro e montaxes artísticas nas que demostra que a iluminación pode ser “performática e unha creación en si mesma”, mentres que Matamoro destaca pola súa sorprendente visión da realidade e a capacidade artística para converter “o punto de vista e a observación do iluminado nun obxecto artístico en si mesmo oculto ata que a súa ollada o dá a coñecer”.

Charla aberta entre SERGIO PORTELA, NOVE NOEL e MARÍA LADO: A ARTE PÚBLICA

Continúa, no local de Évame Oroza, o ciclo Charlas Abertas  no que artistas de diferentes disciplinas conversarán en torno a un tema, con María Lado como moderadora. Desta forma, o 20 de setembro (20:00 horas), celebrarase a segunda cita das  Charlas Abertas , que estará protagonizada polo escultor Sergio Portela e o muralista Nove Noel e terá como fío condutor a arte pública. Entrada libre ata completar aforo.

Portela é autor de esculturas como A Sirena, que mira ao océano no Museo do Mar de Vigo, así como o encargado de realizar o conxunto escultórico adicado a Verne que se mergulla fronte á praia de Cesantes, ideado por Mincho Lastra. Nove Noel é muralista, ilustrador e pintor e a súa obra urbana está diseminada por varias cidades galegas e españolas, así como lonxe das nosas fronteiras, como por exemplo en Brasil ou México. Na cidade olívica puxo cor e memoria á loita do naval nas escaleiras que unen a rúa Conde de Torrecedeira con Pi i Margall.

Coma sempre, esperámosvos en Évame Oroza cun sorriso!

Comienza CHARLAS ABERTAS con Jaione Camborda e Bea Saiáns: CINE E REPRESENTACIÓN DE XENERO

Baixo o nome de Charlas Abertas, a asociación Évame Oroza retoma a súa programación despois do descanso estival para achegar ao público unha serie de conversas nas que artistas de diferentes disciplinas conversaran de maneira libre e distendida sobre elementos comúns do seu traballo, propostas e obxectivos.

A programación do ciclo comeza o  venres 13 de setembro coa sesión adicada ao cine, na que intervirán a directora Jaione Camborda, recentemente gañadora da Concha de Oro no festival de San Sebastián pola película O Corno e Bea Saiáns, novísima cineasta (e poeta) e unha das fundadoras da produtora audiovisual transfeminista Cru Producións. Modera Maria Lado. O punto de partida da súa conversa será a representación de xénero no mundo do cine. 

Presentación de “Antología Poética” de JORGE LOIRA

O xoves 12 de setembro (20:00 horas) terá lugar a presentación do libro Antología poética de Jorge Loira, publicado por Editorial Elvira. No acto participarán, o catedrático de Literatura Española na Universidade de Vigo José Montero Reguera o editor, Xabier Romero. Entrada libre ata encher aforo.

Jorge J. Loira (Bueu 1963-1982) foi un poeta, escritor e escultor, que a pesar de falecer á temperá idade do 18 anos, ten unha produción literaria moi extensa. A obra de Jorge José Loira Gago preséntase aos lectores como a produción literaria dun mozo apaixonado pola expresión poética do transcendente, o que existe máis aló dos sentidos humanos, un mozo ansioso por descubrir a súa propia lírica. Viviu intensamente os seus anhelos e ambicións intelectuais nos seus dezaoito anos cando, de golpe, un aneurisma acabou con eles levándose ao novo e ao poeta, indisolublemente unidos.

TALLER DE TEATRO de Évame Oroza

Despois dos magníficos resultados acadados o pasado curso, o taller de teatro de Évame Oroza, coa profe María Romano ao fronte, regresa con máis forza e máis horarios!

Nesta nova tempada teremos dous niveis (iniciación e intermedio) para alcanzar a máis xente e non retrasar os avances de aqueles que xa teñen coñecementos. Así, as clases comezarán no mes de outubro, os luns co nivel intermedio e o martes, para os principiantes.

Tal e como xa sucedeu o pasado ano, as e os nosos socios terán un importante desconto no taller. O custe do mesmo será de 50 euros para o público en xeral e de 40 euros para aquelas persoas que acrediten ser socias de Évame Oroza.

As clases serán todos os luns e martes a partir das 20:30 horas no local social de Évame Oroza e cada sesión terá unha duración de dúas horas. Ademais, a primeira clase de cada nivel, que se celebrarán o 24 e 30 de setembro, será gratuíta.

Para máis información e para inscribirse nos obradoiros (prazas limitadas) debedes escribir ao mail Este enderezo de correo está a ser protexido dos robots de correo lixo. Precisa activar o JavaScript para velo., onde María responderá todas as vosas preguntas.

Contra TEMPO de SIMÓN PACHECO

O mércores 31 de xullo (19:00 horas) terá lugar, no local de Évame Oroza, a inauguración da exposición Contra TIEMPO  de Simón Pacheco. A mostra poderá visitarse ata finais de setembro, de luns a venres, en horarios de 16:30 a 20:00h.

Contra TIEMPO,  de Simón Pacheco, é unha exposición de fotografías de pequeno e mediano formato (entre 10x15 e 20x30 cm). E quen mellor que o propio Simón para falar da súa obra: "O tema das miñas investigacións como artista foi sempre o tempo, a percepción subxectiva e a resistencia á inexorabilidade da entropía. Actualmente, a miña obra é un intento de manipular plásticamente a miña propia percepción subxectiva do tempo mediante a viaxe permanente. Unha imaxe recorrente na miña obra é a representación gráfica do crecemento como un intento de combater o tempo mediante a conquista do espazo..."

Máis Alto que o Ceo: MOLOCH

Para pechar o festival Máis Alto que o Ceo, na asociación Évame Oroza preparámosvos unha sorpresa moi especial: o venres 26 de xullo, ás 20:00 horas teremos á banda pontevedresa MOLOCH, formada por Laura García , Andrés Martínez e Violeta Mosquera, que fan rock progresivo e experimental baseándose nos versos do poeta Jorge Cuña. A entrada é de balde e o concerto será coñecida como Praza do Abanico, na rúa Subida á Costa nº. 5 do Casco Vello Alto de Vigo.

Máis Alto que o Ceo: CELSO FERNÁNDEZ SANMARTÍN

Avanza xullo e tamén o festival da poesía e a oralidade Máis Alto que o Ceo. O venres 19 de xullo o protagonista será Celso Fernández Sanmartín, poeta da xeración dos 90 dotado cunha voz poética única e moi persoal. A cita será ás 20:00 horas e, sempre que o tempo o permita, celebrarase no exterior (Praza do Abanico). Entrada de balde.  

Celso Fernández Sanmartín (Lalín, 1969), licenciado en Filosofía pola Universidade de Santiago de Compostela, é un poeta e contacontos galego. Como contaconcontos, Celso caracterízase polo seu labor como recolledor e reinventor de historias e contos. O seu repertorio está composto por historias e memorias ligadas á tradición oral galega, que presenta nos seus espectáculos coma un verdadeiro tesouro, cheos de coidado, sentido e paixón pola oralidade, a comunicación e a lingua.

 Celso é unha voz referencial á hora de estudar a poesía dos anos noventa e posteriores en Galicia. En palabras de Helena González (profesora da Universidade Central de Barcelona), Celso Fernández Sanmartín ofrécenos “unha poesía que se ve, se cheira, se toca e ten sabor, porque o mundo sensorial convértese nun revelador máxico do oculto, ata o punto de que non escapan os seus versos á dimensión memorística que subxace tamén na literatura popular, pero tampouco á tenrura que permite ao autor volver os seus ollos ao que para os demais resúltanos invisible”.

Máis Alto que o Ceo: ESTIBALIZ ESPINOSA

O venres, día 12, ás 20.00 horas, contaremos coa presenza de Estíbaliz Espinoza, voz poética da chamada xeración dos 90, que destaca polos seus recitais nos que mestura a poesía con outras disciplinas como a música, a posta en escena dramática ou a videocreación. Sempre é unha sorpresa escoitala porque cada lectura é enriquecida con múltiples elementos.

Estíbaliz Espinosa conta con sete volumes individuais de poesía, dos que destaca o máis recente: As neuronas irmás (Premio Afundación 2017) mais publicou tamén relato curtoe ensaio. Desenvolve a súa actividade cotiá como escritora, creadora e tradutora freelance. Escribe sobre astronomía e literatura para o Cuaderno de Cultura Científica da Universidade do País Vasco, a revista online Principia  ou Setestrelo, do Consello da Cultura Galega; ten colaborado en documentais para o Planetario da Casa das Ciencias ou no MUNCYT. Alén diso imparte palestras, charlas e obradoiros.Compaxina estas actividades coa música, pois é cantante mezzosoprano, e escribe sobre música para a Orquestra Sinfónica de Galicia. É astrónoma amadora, membro da Agrupación Astronómica Coruñesa.

Máis Alto que o Ceo: LEDICIA COSTAS e MARIA LADO

Continuamos co festival de Poesía e Oralidade Máis Alto que o Ceo. O venres 5 de xullo, ás 20:00 horas, poderemos escoitar os versos de Ledicia Costas e María Lado.

Ambas as dúas escritoras volven ler xuntas despois de moitos anos dende a desaparición do colectivo Poetas da Hostia, no que as dúas compartían escenario con outras poetas da súa xeración. Un reencontro que será unha celebración da poesía, da palabra falada e tamén da amizade e que promete ser ben emotivo e divertido

Máis Alto que o Ceo: RESONANCIA con Marc Egea e Marina Oroza

O venres, día 12, ás 20:00 horas, 

Presentación do poemario A ANTÁRTIDA MEDÍA 1,72  de PATRICIA MEIRA

O mércores 19 de xuño (20:00 horas) celebrarase, na sede da Asociación Évame Oroza, a presentación do poemario A Antártida medía 1,72 de Patricia Meira, nun acto cheo de poesía, música e teatro.

A Antártida medía 1,72  é o terceiro libro en solitario de Patricia Meira (Monforte de Lemos 1979), afincada en Vigo hai xa case 20 anos. A presentación deste poemario  publicado pola Editorial Elvira,  conta coa colaboración do grupo teatral Careco Teatro e o músico Juan Gardón. Na presentación tamén estará arroupada pola poeta Silvia Penas; a ilustradora Laura Cochón e o editor Javier Romero.

A Antártida medía 1'72  fala da eterna historia dos afectos e os desafectos, dos límites das parellas por encima da individualidade persoal, as carencias, as dependencias, os apoios mal encamiñados, e este deserto vital é o protagonista silencioso dun camiño, mais ben dun tránsito cara a un mesmo. Descubrir como se detén o tempo, ser testemuñas de como se deteriora un planeta observando un continente será unha dor tan insoportable que non será suficiente para seguir íntegros.

Patricia Meira estuda Filoloxía Hispánica na Universidade de Santiago de Compostela e Educación Social na UNED. Sempre estivo vencellada ao mundo dos versos dende moi cedo como consumidora e lectora de poesía, colaborando activamente en diversas revistas e fanzines. En 2014, publica o seu primeiro poemario No ahogar pescado ni comerlo sentimentalmente (ed. Elvira) e en 2019 Non–maternidade (ed. Urutau). Colabora en distintas publicacións, como A violencia dun sorriso da poeta india Thamizhachi Thangapandian e tamén participa nos libros Latexo Beat, Manuel Antonio e mais nós, Oroza 100...

Festival de oralidade e poesía MAIS ALTO QUE O CEO 

O venres 14 de xullo, ás 20:00 horas, Nuria Vil e Lúa Mosquetera abren o festival Máis Alto que o Ceo en Évame Oroza.

Expo DENDE O LUGAR QUE BUSCAMOS de Tono Carbajo. 

O venres 7 de xuño (20:00 horas) terá lugar, no local de Évame Oroza, a inauguración da exposición Dende o lugar que buscamos de Tono Carbajo. A mostra poderá visitarse ata finais de xullo, de luns a venres, en horarios de 16:30 a 20:00h.

O título da exposición, Dende o lugar que buscamos,  ten o dobre significado da busca do lugar interior, o lugar onde residen os nosos desexos e a nosa natureza íntima e por outro lado refírese tamén á necesidade que todos sentimos de atopar o noso sitio, o noso centro onde vivir e criar os nosos fillos.

Este dobre sentido está representado na exposición por dous proxectos de longo percorrido, As Casiñas dos desexos e Fronteiras. A eses traballos únense  tamén algúns poemas visuais que acompañan en paralelo ás dúas series de obras.

O pasado mes de marzo o artista estivo en Vigo realizando intervencións na paisaxe e tomando fotografías para algunhas das pezas que poderemos ver na Asociación Èvame Oroza. Os traballos de Tono Carbajo destes últimos anos tratan en grande medida sobre o territorio, vivido e entendido de maneiras moi diferentes, desde os posicionamentos máis poéticos aos máis políticos.

As Casiñas dos desexos (The Houses of Whishes) é un proxecto aberto á participación, que comezou en Edimburgo en 2016 en Interviewroom 11 Gallery e chega agora a Vigo pasando por Barcelona, Madrid, Ourense ou Pitoes dás Junas en Portugal entre outros lugares.

 O proceso iníciase pedindo aos que queiran colaborar que envíen de forma anónima á súa páxina web, un desexo persoal e íntimo. Despois, eses desexos serán escritos sobre unhas pequenas casas construídas con madeiras recuperadas de pisos desafiuzados.

Posteriormente o artista vai “liberando” esas pequenas construcións por distintas cidades e contornas naturais. Desde a súa páxina web podemos ver a xeolocalización de cada desexo sobre o mapa.

Se a proposta das Casiñas dos desexos   exprésase máis no terreo do íntimo, Fronteiras é unha serie que incide claramente no aspecto máis humano e político vivido estes últimos anos. O artista decidiu amosar as obras de Fronteiras, pola relación poética co berro en forma de verso de Carlos Oroza ¡Dejad que el trigo crezca en las fronteras!  do seu poema Pliego de cargos.

As fotografías que utiliza como base deste traballo, foron realizadas polo autor durante as súas estancias nos campos de refuxiados de Idomeni, nas illas de Lesbos e Kios en Grecia, na fronteira con Marrocos ou no campo de Presevo en Serbia entre outros.

Pero aquí nos propón outra mirada, agora xa desde a linguaxe da arte. Despois das viaxes e xa de volta no taller, Carbajo enfronta a transformación da imaxe fotográfica noutra cousa. Intervíndoas con materiais diversos como óleo, spray, pintura acrílica e obxectos, xorde entón outra mirada mais fonda e persoal. Actívase o terreo do simbólico, mais aló do que nun principio fora a noticia dunha situación e un momento concreto.

O autor. O traballo de Tono Carbajo (Vigo, 1960) comeza coa pintura a principios dos anos oitenta, pero pronto foi evolucionando cara a un espazo intermedio entre a fotografía, as vídeo-instalacións ou as performances. Actualmente vive en Barcelona.

Algunhas exposicións individuais do artista foron: “Escenas, cadrados negros e outros enlaces”, CGAC, Santiago de Compostela; "Expulsados e outros poemas de resistencia" no Centro de Cultura Contemporánea de Barcelona (CCCB); “14 Km de sel et de rêves”, Anciens Abbatoires, Casabranca Biennale; "Lignes parallèles" e "A túa mirada, o meu abismo" no Centre d'Art Contemporain d'Essaouira, Ifitry (Marrocos); "Tiehl and The Houses Of Wishes" en INTERVIEWROOM 11 Gallery. Edimburgh.

Nestes intres é artista residente no Piramidón Centre d’art Contemporani de Barcelona. A súa obra figura nos fondos de numerosas coleccións públicas e privadas.

Enlaces aos proxectos presentados:

https://www.tonocarbajo.net/las-casas-de-los-deseos

https://www.tonocarbajo.net/fronteras

Concerto de BARAHÚNDA na Praza do Abanico 

O xoves 6 de xuño, Barahúnda presentan o seu libro-disco Fremosas  en Évame Oroza. Publicado por Editorial Toxosoutos, trátase dun traballo musical e divulgativo no que Helena de Alfonso e Jose Lara Gruñeiro interpretan 12 cantigas galego-portuguesas con composicións musicais propias.

O concerto dará comezo ás 20:30 horas e, se o tempo acompaña será na Praza do Abanico, a praza exterior da asociación (rúa Subida á Costa, 5, Casco Vello Alto, Vigo).

Concerto na Praza do Abanico de CATRO NUN ZOCO

O venres 31 de maio poderemos desfrutar en Évame Oroza  dun concerto moi especial da man de Xosé Luis Rivas `Mini´ e o seu grupo `Catro nun zoco´. A actuación celebrarase na Praza do Abanico, aproveitando as boas temperaturas que se esperan, a partir das 20:30 horas. Entrada de balde.

O mítico músico galego chegará a Vigo coa formación Catro nun zoco, no que participan ademais do propio Mini, Mariña Quintillán, Iria Rivas e Navia Rivas. Será unha proposta de música tradicional con mensaxe, onde guitarra, zanfona, violín e voces uniranse para ofrecernos unha velada única coa que damos o pistoletazo de saída aos eventos ao aire libre en Évame Oroza.

Xosé Luís Rivas Cruz, apodado Mini, é profesor, cantautor, compositor, musicólogo e político. Foi un dos fundadores da banda Fuxan os Ventos, na que participou ata  1982 e despois, en 1984, xunto a o seu compañeiro Baldomero Iglesias Dobarrio "Mero", formou A Quenlla. Agora nos presenta este novo proxecto no que Mini comparte escenario coas súas fillas, as músicas Navia e Iria Rivas, e a violinista Marina Quintillán.

Preguntámoslle a Mini sobre a proposta que traen a Évame Oroza e explicounos que “será un concerto de música tradicional e de autor, que é o que levo facendo toda a vida. Buscamos divertir á xente, pero tamén facela pensar un pouco. intentar deixar algunha mensaxe para remoer”.

Presentación de  NON APARTES A MIRADA DO ESPELLO de Ticiana Ghiglione

O 28 de maio terá lugar en Évame Oroza a presentación do libro «Non apartes a mirada do espello», de Ticiana Ghiglione, quen virá acompañada do músico Óscar Lope e a poeta Adri de Vargas. O acto será ás 19:30 horas e actuará como presentadora María Xosé Porteiro.

«Non apartes a mirada do espello» é o segundo libro de Ticiana Ghiglione Darriba e o primeiro de relatos. Este libro bilingüe saíu a luz no mes de marzo do presente ano e é o resultado dun incesante traballo da autora, no que se reúnen contos que, como sinala súa recensión son «por momentos ásperos no sentido de impulsarnos a lembrar aspectos da condición humana que preferiríamos descoñecer (…) «historias inquietantes que nos levan a observar o noso interior na procura das sombras».

O libro vén acompañado por ilustracións, unha sorte de visión gráfica que fortalece o texto e agrega outra mirada, neste caso visual, a un texto que conmove dende as palabras e a gráfica. 

Este traballo xa foi presentado en Pontevedra, en Ribadeo, en A Coruña, en Sarria, en Vilalba en Lugo, e mañá chega a Vigo, a asociación Évame Oroza, onde será presentado pola escritora, xornalistae prologuista desta obra María Xosé Porteiro.

A autora. Ticiana Ghiglione Darriba, artista multidisplinar, licenciada en Belas Artes pola Facultade de Belas Artes de Pontevedra, Universidade de Vigo, naceu en Bos Aires en 1982 e vive en Galicia dende 1992. Como artista realizou múltiples mostras de pintura, individuais e colectivas. Ademais traballou no eido audiovisual, comisariou exposicións e levou adiante a xestión de moitos proxectos de índole cultural. Acadou varios recoñecementos polo seu traballo como artista, escritora e realizadora de curtas audiovisuais. É a creadora do personaxe de viñetas chamado Dina Mita, presente en moitos medios de comunicación como Sermos Galiza, Diario de Pontevedra, Muller Art e Onda Cero. En 2018, publicou o libro Dinamitadas, el despertar de la ironía, unha compilación de viñetas de Dina Mita, que conta con dous prólogos: un de Xaquín Marín e outro de Xesús Alonso Montero.

ROTEIRO CARLOS OROZA polo Casco Histórico Vigués

O sábado 25 de maio (12:00 horas) celebraremos o roteiro Carlos Oroza, un percorrido guiado polos espazos do Casco Vello Alto de Vigo que tanto gustaban e inspiraban a Carlos, e que finalizará no local de Évame Oroza.

Maio é un mes moi especial para a asociación Évame Oroza, xa que é cando se conmemora o aniversario do nacemento do xenial poeta oral. Así, pechamos a nosa programación de maio con este roteiro, que terá como punto de saída, a rúa que está na parte de atrás do Museo MARCO, onde estaba ubicada a cafetería Detras do Marco, na que Carlos pasou moitas horas dos seus últimos anos. Neste punto falará o presidente da asociación Évame Oroza, Xabier Romero.

Continuará a marcha por Príncipe, ata chegar a rúa de Carlos Oroza, onde será Antón Beiras, vicepresidente de Évame Oroza, o que tomará a palabra. Continuaremos avanzando ata a rúa Elduayen, para facer unha parada e escoita recitar a Franchesca d´A Silva. E tras enchernos da poesía de Oroza, seguiremos avanzando ata o Paseo de Alfonso, outro dos puntos favoritos de Carlos, onde será Antón Patiño, un dos socios fundadores da entidade, e que tomará a palabra. Xa só quedarán dúas paradas máis. A primeira será na editorial Elvira, un punto obrigado, xa que foi aquí onde se publicou toda a súa obra, a pesar de que Carlos non era moi amante do papel. Na editorial, será a quenda de Arantxa Amatriaín, representante da editorial e socia fundadora. Tras este fermoso percorrido, a marcha rematará no local de Évame Oroza onde terá lugar unha lectura de poemas.

Presentación dos poemarios galardoados no Premio Internacional de Poesía Carlos Oroza

O venres 24 de maio, ás 20:00 horas, Évame Oroza acollerá a presentación ao público dos poemarios Herbario da noite pecha de Lupe Gómez e Carbono 14, de Morales Monterríos, que foron os galardoados na primeira edición do Premio Internacional de Poesía Carlos Oroza, á que se presentaron máis de 1.100 escritores de todo o mundo.

No evento deste venres participarán os dous autores premiados: Lupe Gómez, na modalidade de galego e Morales Monterríos, en castelán. Será un emotivo acto no que ambos presentarán o seu poemario publicado e lerán algúns dos poemas recollidos nel.

Modalidade de castelán

O Premio Carlos Oroza na modalidade de castelán foi para a obra “Carbono 14”, do chileno Roberto Morales Miranda - que firma as súas obras como Morales Monterríos -. O chileno viaxou ata Vigo para participar neste evento e poder desfrutar coa asociación Évame Oroza da publicación do seu poemario, xa que en novembro de 2023 non puido acudir a gala de entrega dos premios.

Morales Monterríos (Chile, 1970) publicou os libros Antichton (2000), Pantheon (2004), Príncipe de Chile (2007), Hécate (2009), Popol Vudú, Libro 1, Nómade in Chile (2017), Poemas de amor do obreiro John Bágoas. Os seus grandes éxitos (2018), O Tabo Che King (2022), NODO (2022). En 2022 resultou gañador do Premio Hispanoamericano de Poesía de San Salvador co libro NODO, e do XXII Premio de poesía Vicente Núñez (Córdoba, España), co seu libro Seda-Sade.

Modalidade de galego

Lupe Gómez foi a gañadora da modalidade de galego co poemario “Herbario da noite pecha”. Na acta, o xurado valorou “a linguaxe limpa, transparente e luminosa dos seus versos. O seu carácter sensorial é quen de transportar o lector cara a un universo da memoria vencellada coa infancia a través dunha ollada tenra e feminina. Un poemario directo de verso curto, onde se percibe o latexo da terra”.

Guadalupe Gómez Arto, nada en Fisteus (Curtis) en 1972, é unha poeta e xornalista galega, coñecida como Lupe Gómez, que publicou libros de poesía como Pornografía (1995), Camuflaxe (2017), Caracois de Belvís (2020) ou Montaña Ioga (2022). Obtivo, entre outros, os premios Johan Carballeira, Premio da Crítica, Miguel González Garcés e Fiz Vergara Vilariño. É autora da narración autobiográfica Fisteus era un mundo (2001) e do epistolario Fosforescencias (2019). 2023 foi un gran ano para Lupe, xa que tamén gañou o XI Premio de Poesía Manuel Lueiro Rey, Con Salón de Té (Xerais, 2023).

O Premio Internacional de Poesía Carlos Oroza xurdiu no ano 2023 coa vontade de recoñecer e reivindicar a figura do poeta, que foi unha das voces máis excepcionais da súa xeración. Este premio literario, que ten unha periodicidade bienal, está organizado pola Asociación Évame Oroza en colaboración con la Consellería de Cultura de la Xunta de Galicia. En cada unha das modalidades, os premiados recibiron 6.000 euros e una figura de Oroza realizada en bronce pola artista Cuqui Piñeiro, ademais da publicación do poemario, que se faría no mes de maio de 2024, coincidindo coa celebración do aniversario de Carlos Oroza.

Terceira sesión do CINEFÓRUM coa proxección da película  “COMPARTIMENTO No 6”

O xoves 23 de maio,  as 19:30 horas, temos a nosa cita mensual co Cineforum, nunha sesión aberta e gratuíta na que despois da proxección da película, haberá debate. Será a terceira sesión do Cineforum en Évame Oroza, na que poderemos desfrutar da película finlandesa “Compartimento No 6”, do ano 2021, que recibiu o Gran Premio do xurado de Cannes.

Sinopse: Unha moza universitaria finlandesa colle un tren cara a Moscú para ir ao xacemento arqueolóxico de Murmansk. Para chegar ate alí terá que compartir o seu compartimento cun descoñecido, un mineiro ruso. Esta convivencia máis uns encontros improbables unirán aos poucos a estes dous seres aparentemente opostos.

Ficha: Ano: 2021 | Duración: 107 minutos | Xénero: Drama/Romance | Dirección: Juho Kuosmanen | Guión: Andris Feldmanis, Juho Kuosmanen, Livia Ulman. Novela: Rosa Liksom |Fotografía: Jani-Petteri Passi | Reparto: Seidi Haarla, Yuriy Borisov, Dinara Drukarova, Vladimir Lysenko, Galina Petrova.

Recital 101 aniversario. Presentación OROZA 100

O luns 13 de maio é o día do aniversario do nacemento de Carlos Oroza. Este luns cumpriría 101 anos e pensamos que a mellor forma de celebralo é cun recital para lembrar os seus versos, a súa figura, as súas anécdotas. Este acto, que se celebrará na súa casa, no local de Évame Oroza, servirá tamén para presentar o libro Oroza 100, co que se quixo homenaxear ao xenial poeta con motivo do seu centenario.
O recital comezará ás 20:00 horas e contaremos varios dos participantes no libro Oroza 100, como María Xosé Porteiro, Antón Patiño, Menchu Lamas, Antón Beiras, Clara do Roxo, Alberto Avendaño, Francesca D´A Silva e Luz Eva Fernández.

TIEMBLA TODO LO VIVO de Eduardo Flores Arróliga

O venres 10 de maio, ás 20:00 horas, recibiremos a visita do ensaísta, investigador e mestre Eduardo Flores Arróliga, que dende Nicaragua vén presentar o seu libro “Tiembla todo lo vivo” (Anamá, 2003) e que estará acompañado por Samuel Merino e Alberto Vilaboa.

Nesta obra, a través de nove ensaios narrativos sobre o estremecemento da condición humana, o autor dialoga con personaxes conceptuais da filosofía e literatura para que as leitoras fiquen envolvidas nas tramas da errancia, a finitude e a interconexión coa natureza dende a cartografía do vivido. Atopamos un texto que aposta pola tradición do ensaio como forma de pensamento e que abre a posibilidade de contar dende unha linguaxe persoal e narrativa o enfrontamento coas complexas fibras que constitúen a vida.

Eduardo Flores Arróliga (Managua, Nicaragua) é ensaísta, investigador e mestre. Doutor en Filosofía polo Instituto de Investigacións Filosóficas da Universidade Michoacana de San Nicolás de Hidalgo, Morelia, México. Os seus textos foron publicados en xornais e revistas latinoamericanas. Actualmente radica en Galicia.

BREVE HISTORIA DE O CASTRO DE VIGO

O xoves 9 de maio, ás 20:00 horas, celebrarase en Évame Oroza a presentación do libro «Breve Historia de O Castro de Vigo», de José Manuel Hidalgo Cuñarro, que estará acompañado no acto polo investigador Fernando Javier Costas Goberna e o editor Xabier Romero. O libro, publicado por Editorial Elvira, ofrece un percorrido pola historia do poboado e a fortaleza do castro vigués, escrito por quen dirixiu as escavacións arqueolóxicas deste xacemento entre os anos 1981 e 1988.

Novos datos arqueolóxicos e inéditas fontes documentais manuscritas permiten presentar ao público unha síntese histórica do monte de O Castro en Vigo, situado no centro da cidade e orixe dela. Protagonista e testemuña dos máis importantes acontecementos, analizaranse os restos arqueolóxicos, froito de moitos anos de traballo minucioso, que xunto aos datos históricos que posuímos, permitirannos falar dos remotos tempos prehistóricos á Idade Contemporánea.

O libro conta cun anexo gráfico, dando unha gran importancia ás boas ilustracións e ofrecendo ás lector imaxes inéditas. Ademais, tamén se inclúen fotografías das escavacións realizadas, así como dúas maquetas elaboradas expresamente para esta edición nas que se reconstrúe a fortaleza, cos seus tres recintos defensivos e o poboado castrexo e ás que tamén se poderá acceder a través dun código QR.

É un libro-obxecto cheo de misterios que o autor irá descubrindo a medida que le, coma se fose un arqueólogo no seu traballo minucioso en cada escavación.

José Manuel Hidalgo Cuñarro (1956, A Estrada) foi o primeiro arqueólogo municipal (1982) e director dos museos (1992) do Concello de Vigo. Dirixiu diversas escavacións arqueolóxicas en Vigo e a súa contorna: Castro de Vigo, illa de Toralla e Torres de Padín en Teis; dolmens/dólmenes de Cotogrande en Cabral; vilas romanas de Alcabre e Toralla; e a primeira intervención urbana no centro histórico da cidade (cimentos da actual biblioteca pública “Juan Campañel”), que confirmaron restos romanos nesa zona (1991). Froito das intensas prospeccións arqueolóxicas realizadas no noso municipio foi a elaboración dun inventario dos xacementos arqueolóxicos existentes (1985), que serviu como base fundamental do actual catálogo patrimonial municipal.

En O Castro de Vigo realizou oito campañas de escavacións sistemáticas de investigación (1981–1988), que deron como resultado a localización de máis de 45 estruturas pétreas, que hoxe día están musealizadas e pódense visitar; e o descubrimento de novas construcións na ladeira oposta, que evidenciaron a ocupación tamén desta zona, na mesma época que a anterior.

Membro fundador da asociación arqueolóxica viguesa, dos Institutos de Estudos Tudenses e Vigueses e finalmente da asociación cultural “Amigos do Castro de Vigo”, da que na actualidade é o seu presidente. De 1994 a 2002, vocal e vicepresidente do comité español do Consello Internacional de Museos (ICOM) e membro dos comités internacionais de Educación e Acción Cultural; museoloxía; e arqueoloxía e Historia, do mesmo organismo, dependente da UNESCO.

OROZA, O ULTIMO XOGLAR

A exposición “Oroza, o último xoglar”, creada para conmemorar o centenario do nacemento do poeta Carlos Oroza, chega a Ferrol na Semana da Poesía Salvaxe. Esta data foi elixida coidadosamente polo Concello de Ferrol xa que Oroza tivo unha intensa relación coa cidade ferrolá e participou en varias edición da Semana da Poesía Salvaxe e por iso quixeron homenaxealo coincidindo coa súa celebración.

A mostra será inaugurada o mércores 24 de abril na Praza da Constitución, onde poderá ser visitada ata o vindeiro 24 de maio. No acto, que se celebrará ás 19:30 horas, intervirán o Premio Nacional de Poesía Juan Carlos Mestre; a poeta galega María Lado; o concelleiro de Cultura, José Antonio Ponte, e o presidente da asociación Évame Oroza, Xabier Romero.

A exposición está formada por seis cubos xigantes para exterior na que, a través de imaxes e texto, se fai percorrido pola vida e obra do gran poeta oral. En 2023, a mostra visitou Vigo, Pontevedra, Viveiro, O Caurel, Ribadavia, Lugo, Santiago de Compostela e A Coruña. Esta presentación, organizada por Évame Oroza, contaba co apoio económico da Xunta de Galicia e a colaboración dos diferentes concellos.

En 2024 a primeira parada da exposición “Oroza, o último xoglar” estivo no CIFP Carlos Oroza de Pontevedra, que quixo tamén conmemorar o centenario do nacemento do poeta que lle da nome ao centro, cun menú inspirado no libro Oroza 100. A segunda parada será esta, en Ferrol, un lugar onde recordan con cariño e admiración ao poeta oral por excelencia.

FESTIVAL CREATIVA:  ZoomoAvi | Carme López

O local de Évame Oroza acollerá o sábado 20 de abril o Festival Creativa, impulsado pola Galería Maraca  e Dot Galicia e que se desenvolve entre o 19 e o 21 de abril na galería, no museo Marco e en Évame Oroza. Este festival, que naceu o pasado ano, unifica creatividade e cultura nun evento que pretende acercar a cultura a novos públicos, expandindo os seus límites, tanto espaciais como conceptuais.

Na xornada do sábado haberá dous concertos no local da asociación. Á mañá, ás 12:00 horas, será o momento de ZoomoAvi, beatmaker vigués que chega con sampler e teclados. Na súa música mestúrase o novo e o vello, un cóctel de xéneros onde o sabor principal é o hip hop.

Pola tarde, ás 17:45 horas dará comezo o concerto de Carme López, intérprete, docente e investigadora no eido da música de tradición oral galega. Doutora pola UDC cunha tese sobre o canto tradicional feminino en Galicia, presentará o seu novo disco Quintela, primeiro disco de música experimental que emprega a gaita como instrumento base.

VÉRSAME - ESPAZO ABERTO

"VÉRSAME - ESPAZO ABERTO" celebra o seu primeiro medio ano de vida e faino cunha sesión especial que vai ter lugar este xoves 18 de abril no local da Asociación Cultural Évame Oroza.

VÉRSAME é un espazo no que cabe a poesía, o relato, cancións e outras manifestacións artísticas nunha sorte de micro aberto ao que están convidadas todas as persoas que queiran participar mostrando o seu traballo. A cita será o 18 de abril, ás 20:00 horas, e para poder participar sobre o escenario abonda con anotarse previamente no propio local. E tamén podes acudir como público para gozar con todas e todos os artistas presentes.

VÉRSAME - ESPAZO ABERTO é un evento que arrincou a finais do verán do ano 2023 en Vigo. É un espazo aberto á poesía, o microrrelato, o microteatro, as artes gráficas e a música. Os seus fundadores foron Pablo Vila e Pedro Román e agora se incorporaron Susi de Latorre e Alba Enríquez. A primeira edición de Vérsame celebrouse o 30 de xullo de 2023 no Café Uf Negra Sombra, lugar onde se reúnen unha vez ao mes para sorprender e mostrar o traballo de novos e vellos creadores. Nestas citas mensuais contan con tres artistas en cartel e un convidado que mostra a súa obra. Ademais, ata seis artistas poden rexistrarse na propia sala antes do comezo da sesión.

 Proxección de THE DROP

O xoves 11 de abril (19:30 horas) celebrarase a segunda sesión do Cinefórum en Évame Oroza, coa proxección da película The Drop. A entrada é de balde e ao remate da película celebrarase un debate en torno á mesma.

Esta proposta, que nace co obxectivo de concederlle un espazo ao cinema na asociación, arrincou no mes de febreiro cunha primeira xornada adicada a Mimosas de Óliver Laxe e agora é a quenda de The Drop. Ata agora dúas propostas ben diferentes para chegar a todo tipo de público, aínda que o máis importante é que sexa afeccionado ao sétimo arte.

The Drop é un thriller negro estadounidense do ano 2014 dirixido por Michaël R. Roskam e protagonizado por Tom Hardy, Noomi Rapace, James Gandolfini (no
seu último papel cinematográfico) e Matthias Schoenaerts, que fan un fantástico
traballo.

O film conta a historia de Bob Saginowski, un barman que se ve envolto nunha
investigación despois de que rouben no bar no que traballa, que está controlado
polo crime organizado.

ESCLAVOS DE NUESTRA SOMBRA de Jorge Lens

O venres 5 de abril (19:30 horas) celebrarase, na sede da Asociación Évame Oroza, a inauguración da exposición Esclavos de nuestra sombra do fotógrafo vigués Jorge Lens. A mostra permanecerá en Évame Oroza ata finais de maio.

A través de 29 fotografías tomadas na cidade de Vigo, Esclavos de nuestra sombra convídanos a percorrer as rúas con novos ollos, a descubrir a beleza no común e a reflexionar sobre a complexidade da vida urbana, nunha viaxe visual e verbal. Nesta mirada atenta e honesta sobre a nosa contorna reside a auténtica poesía.

O fotógrafo rueiro, do mesmo xeito que o poeta paseante, penétrase nos recunchos da cidade, observando atentamente a vida que bole á súa ao redor ou o silencio que emana das súas rúas.  Acompañando a estas imaxes, e no propio título da exposición Esclavos de nuestra sombra, atopamos os versos de Carlos Oroza, cuxa poesía se nutre do deambular polas rúas e do encontro co trivial. As súas palabras entrelázanse coas imaxes, creando un diálogo entre o visual e o verbal, entre a imaxe capturada e a emoción evocada. Neste intercambio, revélase a poesía que subxace nas experiencias cotiás, nos recunchos esquecidos e nos rostros anónimos que poboan a cidade.

Jorge Lens (Vigo, 1967), licenciado en Comunicación Audiovisual pola Universidad Complutense de Madrid e doutor pola Universidade de Vigo, combinou nos seus inicios o seu traballo diario no xornal La Voz de Galicia coa fotografía de autor, participando en numerosas exposicións tanto en Galicia como a nivel internacional.

No ano 1997 comeza exercer como profesor de fotografía na Universidade de Vigo -labor que continúa exercendo- no Grado de Comunicación Audiovisual e no Grado de Publicidade e RR.PP. Despois duns anos desvinculado da práctica fotográfica, no ano 2016 retoma a fotografía e comeza a desenvolver un amplo proxecto no ámbito da fotografía urbana, City Blues, que o levou a retratar as grandes capitais europeas e que, producido pola AECID, foi exposto a través da rede de Centros Culturais de España en Latinoamérica.

Como consecuencia destas itinerancias, actualmente está a ultimar un novo proxecto documental ao redor da fotografía urbana nas capitais centroamericanas que recompilará fotografías tomadas nas cidades de San Salvador, San José de Costa Rica, cidade de Guatemala, Tegucigalpa, Managua e cidade de Panamá.

VOTO DE SILENCIO de Andrea Maneiro

O xoves 4 de abril (20:00 horas) celebrarase, na sede da asociación, a presentación do libro Voto de Silencio, de Andrea F. Maneiro, nun acto cheo de música e poesía.

No evento participarán, ademais da propia autora, Clara Pino, poeta e música, que fará de mestra de cerimonias, e Manuel Dopico, músico e compoñente de varios grupos de música tradicional e folk (agora mesmo en A Quenlla e Cantos da Terra).

"Voto de silencio" é un libro que fala da educación das mulleres, educadas para someterse. Este poemario obtivo o IV Premio de poesía Eduardo Pondal e está publicado pola Editorial Medulia.

Andrea F. Maneiro (60 anos, de Carril), ademais do Premio Eduardo Pondal con esta obra, conta no seu poder con varios premios máis. En 2020, foi a
gañadora da IX edición do Certame de Poesía Manuel Leiras Pulpeiro, co libro Inventario dun adeus. Expiatoria. Ao ano seguinte, acadou o primeiro
premio do V Certame de Poesía Torre de Caldaloba, co poemario Contra-tempos e tamén recibiu o máximo galardo no XVI Certame de Poesía Erótica Illas Sisargas, co poemario Edénicas. Andrea é unha gran afeccionada á fotografía e adoita ilustrar os seus poemarios coas súas fotografías, tal e como sucede precisamente con Voto de Silencio.

Acción O SER E O NERVIO

O vindeiro venres 15 de marzo ás 19:30 horas Branca Trigo e Ramón Trigo presentan na asociación Évame Oroza a acción O ser e o nervio, onde a pintura e a poesía establecen unha simbiose violenta coma a do ser humano e o lume. Trátase dun traballo que explora a memoria, o tránsito e a potencialidade da ruína mediante o recitado, a música e a creación en vivo dun cadro de gran formato.

Branca Trigo codirixe a editorial de poesía Malafera e organiza xunto con outres poetas o micro aberto Cerimonia de gaivotas. Publicou os libros Coñecemento do Medo (2021) e Condolore (2022) ademais de participar en diversos volumes colectivos.

Ramón Trigo é un pintor, escultor, autor de cómic e ilustrador. A súa obra foi exposta en Galicia, e distintas cidades de España, Portugal, Bélxica, Holanda, Lituania, Alemaña, Italia e Nixeria. Como ilustrador publicou numerosos libros e recibiu premios coma o Isaac Díaz Pardo e o Premio Nacional Lazarillo por Leviatán; o Premio Ciudad de Alicante por Casa vacía ou o Premio Cabildo Gran Canaria por Yo vivía en el fin del mundo.

Recital IRIA E O LOBO

O sábado 24 presentarase o recital Iria e O Lobo, no que Iria Bragado e Rafael López Vilas nos achegarán poemas dos seus últimos libros, coa colaboración de Susi de la Torre, Orisel Gaspar, Pablo Vila e Pedro Román. O evento comezará ás 19 :30 horas no local da asociación cultural Évame e a entrada é de balde, ata encher aforo.

Rafael López Vilas (Vigo, 1975), cando escribe poesía, se converte en El Lobo está aquí. O seu último libro Vosotros, el pueblo. Poemas antisociales (editorial Versátiles) presentouse no último trimestre do ano 2023. López Vilas describe a súa poesía como “realismo social, crítico, cáustico e mordaz, e busca unha reacción. Ten un alcance moi curto, pero busca molestar”.
Iria Bragado é unha figura coñecida en Vigo polas súas expresións artísticas e polo seu compromiso social. O seu primeiro poemario “Versos violentos”, (editorial Saurobuks, 2023) é un libro cheo de poesía de denuncia social, feminismo e arte gráfica.

Comeza o cinefórum coa proxección da a película MIMOSAS de Oliver Laxe

Esta semana comeza Cinefórum na Asociación Évame Oroza, unha proposta que nade co obxectivo de adicarlle un espazo ao cinema. O xoves 22 de febreiro terá lugar a primeira sesión coa proxección de "Mimosas" de Óliver Laxe, ás 19:30 h. A entrada é de balde e despois haberá tempo para o debate e conversa sobre o film.

Mimosas é unha película dramática de 2016, descrita polo seu director Oliver Laxe como «un western relixioso». A película é unha coprodución internacional entre Catar, España, Marrocos e Francia. Proxectouse na sección da Semana Internacional da Crítica no Festival de Cinema de Cannes 2016, onde gañou o Premio Nespresso. 

O filme relata a historia de Shakib, un home moderno que viaxa ás montañas de Marrocos, onde se atopa a dous bandidos doutra época histórica que levan o cadáver dun ancián xeque camiño á antiga cidade de Sijilmasa co propósito de permitirlle o descanso á beira dos seus seres queridos.

.

Recital poético-musical  "EL SUEÑO Y EL ECO" de Pablo Vila

O venres 16 de febreiro, ás 19:30 horas, Pablo Vila levará ao local da asociación Évame Oroza o espectáculo El sueño y el eco,  un recital poético-musical con guitarra (acústica e flamenca) co que rende homenaxe a grandes nomes da poesía de todos os tempos. Quevedo, Rosalía de Castro, Juan Ramón Jiménez, Ernestina Champourcín ou Lorca, entre outros, danse cita neste espectáculo no que o cantautor comparte conversas íntimas cos poetas protagonistas, para despois interpretar algún dos seus poemas en forma de canción. Unha maneira diferente, amena e chea de sensibilidade de achegarse á poesía.

Presentación da expo "NADA ME PERTENCE, TUDO FAZ PARTE DE MIN" de Sol Mariño

Esta semana, na sede da Asociación Évame Oroza temos a inauguración da exposición Nada me pertence, tudo faz parte de min da artista e poeta Sol Mariño. O acto de inauguración será o venres día 9 de febreiro ás 19:30 horas. Durante a mesma, haberá unha actuación que une a poesía de Sol Mariño coa música de Pablo Caamiña (zanfona) e Marta Seco (violín) nun espectáculo titulado As alas da serpe.

Formada en Comunicación Audiovisual e Fotografía, Sol Mariño (1986) dedícase á serigrafía téxtil, a fotografía e a pintura mural. En 2023 publica As alas da serpe (Aira, 2023) seu primeiro poemario editado, a partir a partir do cal xurde unha performance poético-musical, coa súa voz narradora e os instrumentos de Pablo Caamiña (guitarra, zanfona, caixa de música) e Marta Seco (violín e voz).

Na mostra fotográfica Nada me pertence, tudo faz parte de min, Sol Mariño recolle un percorrido vital no que a colleita da mirada se engule e fai camiño. Pegadas dunha autobiografía en analóxico, que vai dende o 2011 ao 2022, trazando círculos entre a Galiza e o Brasil, os bosques, o alimento, o territorio e o fogar, fóra e dentro do corpo. A mostra vencéllase profundamente co seu poemario As alas da serpe. A mostra poderá visitarse ata mediados de marzo de luns a vernres en horarios de 16:30 a 20:00 h.

Presentación do libro EL ÚLTIMO CONCIERTO de Xaime Fandiño

A Asociación Évame Oroza acollerá o 31 de xaneiro a presentación do libro El último concierto  de Xaime Fandiño. No acto participarán o propio autor, o editor Xabier Romero e os actores Antonio Durán “Morris” e Manuel Manquiña.  

En El último concierto, Xaime Fandiño trata de reivindicar a heteroxeneidade e o dereito para decidir en calquera momento do periplo vital, sexas novo, vello, maduro ou intermedio, porque a vida está chea de oportunidades e os nosos canallas protagonistas non están para desaproveitar nin un minuto da súa existencia. Unha road movie infestada de humor acedo que che sorprende en cada páxina; pois sempre pode ocorrer algo que nin che imaxinas porque a vida é así.  

Xaime Fandiño é É licenciado en xornalismo pola USC, doutor en comunicación pola UCM e máster en Filosofía pola USC. Formou parte do equipo de profesionais que a mediados dos anos 80 puxeron en marcha a TVG. Foi decano da Facultade de Ciencias Sociais e da Comunicación da UVigo, xefe da Cátedra de Televisión e Novos Medios da EICTV en Cuba, profesor na Facultade de Ciencias da Comunicación da USC e director do primeiro Máster en Industria Musical desa universidade. Na actualidade é membro da comisión e un dos impulsores da Cátedra de Idadismo da UVigo, así como colaborador en Faro de Vigo.

ANIVERSARIO DE ÉVAME OROZA

O venres 26, ás 19:00 horas, celebraremos o aniversario da sede física de Évame Oroza ao que convidamos a todas as persoas que desexen festexalo con nós. Na festa a creación será a protagonista da man de Silvia Penas, Clara do Roxo, Alberto Avendaño, Orisel Gaspar,  Francesca d’a Silva, Pedro Román, Samuel Merino e María Lado. Trátase dunha selección de artistas ás que calquera persoa do público pode encargar poemas, pequenos relatos, cancións ou debuxos (segundo a modalidade de cada artista) co tema e a historia que desexes e que serán elaborados en directo e entregados nunha lectura e mostra que terá lugar ao final do acto. Mentres as nosas creadoras e creadores fan os teus encargos, podes brindar, conversar coas amizades e recordar os mellores momentos de todo un ano de actividade cultural en Évame Oroza.

Presentación de “FENÓMENO FAN”  de Clara Pino e Xavier Magalhäes

O xoves 25 de xaneiro (19:30 horas) celebrarase en Évame Oroza a presentación de “Fenómeno Fan”, un libro no que confluén a arte literaria de Clara Pino coa pictórica de  Xavier Magalhäes.  O acto tamén será un evento multicultural, con música e poesía, do que poderán desfrutar  todas as persoas que participen no evento.

“Fenómeno Fan”, é un mergullo no universo literario e pictórico de Clara Pino e Xavier Magalhäes. Os dous artistas fusionan e consolidan unha relación artística e de amizade chea de colaboracións desde o ano 2007. A partir do fío condutor tan globalista e alienante que supón o suceso «fan» en moitas expresións artísticas, autora e autor extrapolan e fían outras temáticas imprescindibles na nosa sociedade actual, conformando un corpus que se xestou durante o confinamento. Desta forma, xurdiu un libro cheo de beleza e introspeción no que o público gozará de cada páxina, tanto polo seu compromiso coma pola interdisciplinariedade entre as artes.

MAR ALLEO. Fotos de  Luis Basilio, Yatir Fernández e Ana Beiras

O sábado 13 de xaneiro celebrarase en Évame Oroza o acto de inauguración da exposición fotográfica colectiva Mar Alleo, dos artistas Luis Basilio, Yatir Fernández e Ana Beiras. A mostra permanecerá no local ata comezos de febreiro e poderá ser visitada polas tardes (de 16:30 a 20:00 horas).

Mar Alleo é un percorrido fotográfico onde cada un dos autores amosa a perspectiva que ten fronte ao mar, e “tentan demostrar como o conxunto do observado por cada suxeito compón a nosa colectividade”.

O acto de inauguración de Mar Alleo celebrarase o sábado 13 de xaneiro, a partir das 19:30 horas, no local da asociación cultural Évame Oroza.

Fallados os premios da primeira edición do PREMIO INTERNACIONAL DE POESÍA CARLOS OROZA

O 7 de novembro deuse a coñecer en rolda de prensa o fallo do xurado da primeira edición do Premio Internacional de Poesía Carlos Oroza, nas modalidades de galego e castelán. A rolda de prensa celebrouse o martes ás 11:15 horas no local da asociación *Évame Oroza e na mesma participaron a delegada da Xunta de Galicia en Vigo, Ana Ortiz; a vicepresidente primeira da Deputación Provincial de Pontevedra, Marta Fernández-Tapias; o presidente da asociación Évame Oroza, Xabier Romero; o presidente do xurado da modalidade de galego, Antonio García Teijeiro e a integrante do xurado de castelán Patricia Meira.

A obra “Carbono 14”, de Roberto Morales Miranda - que firma as súas obras como Morales Monterríos - foi elixida como gañadora do Premio Carlos Oroza na modalidade de castelán. O xurado destaca na acta de concesión do premio “o coidadoso traballo coa linguaxe nunha obra que explora o poético desde o razoamento lóxico sen deixar de atender ao lirismo e á procura da beleza. É, en definitiva, un poemario que na súa sutileza mestra esconde un manual para entender o mundo no que fisicamente vivimos”.

O xurado da modalidade galego estivo composto pola escritora An Alfaia, a poeta María Landesa e o crítico Ramón Rozas, actuando como presidente o tamén escritor Antonio García Teijeiro. Finalmente, tras unha votación que rematou nun veredicto outorgado por maioría, resultou gañador o libro Herbario da noite pecha, de Lupe Gómez.

» Ver máis

O ciclo POETAS REFERENTES chega ao seu fin cunha charla sobre UXÍO NOVONEYRA

O día 27, terá lugar a última das charlas de Poetas Referentes. Nesta ocasión a poeta Branca Novoneyra fará un percorrido cronolóxico pola vida e obra do escritor Uxío Novoneyra, prestando especial atención aos anos 60 e 70 nos que a relación entre o poeta do Courel e Carlos Oroza foi máis estreita, chegando a converterse nunha amizade e convivencia que acabou callando na escrita de ambos. Eses puntos de contacto serán tamén obxecto de reflexión na conferencia de Branca, que ilustrará o faladoiro con fotografías do arquivo da Fundación Uxío Novoneyra, da que ela mesma forma parte, como reflexo deses anos de contacto entre ambos os dous poetas, primeiro en Madrid e despois no Courel.

Coa conferencia de Branca sobre Uxío Novoneyra péchase o ciclo Poetas Referentes que, ao longo deste mes, se centrou nas poéticas e biografías de diversos autores fundamentais na biblioteca de Oroza. A asociación Évame Oroza destaca a boa acollida que as conferencias tiveron entre o público e o interese co que foron recibidas e continúa a traballar en propostas semellantes que contribúan á dinamización cultural da cidade, atendendo non só á literatura senón tamén a outras artes.

Presentación do libro  «UN CURSO CON CARLOS OROZA» de Fernando Fernández Domonte

O mércores  25 de outubro presentarase no local da Asociación Cultural Évame Oroza o libro «Un curso con Carlos Oroza» do escritor e xornalista Fernando Fernández Domonte. No acto de presentación,  participarán, ademais do autor, o responsable da Editorial Elvira, Xabier Romero, e ambos farannos pasar un bo rato recordando anécdotas vividas xunto ao xenial poeta Carlos Oroza.

Durante os anos da súa vida bohemia en Madrid, o gran poeta oral Carlos Oroza (Viveiro, 1923–Vigo, 2015) compartiu piso por uns meses con Fernando A. Fernández Domonte, quen neses momentos era un estudante de xornalismo. Neste libro, Domonte, a través de dez divertidos e reveladores relatos, consegue achegarnos ao particular xeito que o poeta tiña de encarar a vida; ao seu proverbial carácter rebelde e contraditorio, desapego polas cousas materiais e provocativo sentido do humor.

O aspecto máis humano de Carlos Oroza, por veces soberbio, por veces humilde e desvalido, sempre hipercrítico e descoidado, preguiceiro no día a día, pero temperamental e preocupado cando se trataba de subirse a un escenario, queda reflectido nestas páxinas, nas que tamén se descobren algunhas das lideiras máis íntimas e cotiás do poeta.

POETAS REFERENTES: ROSALÍA DE CASTRO por Anxo Angueira

Rosalía de Castro será a protagonista da terceira charla do ciclo de conferencias `Poetas Referentes ́, que se está a celebrar ao longo do mes de outubro
na asociación Évame Oroza. Nesta oportunidade o conferenciante será Anxo Angueira, presidente da Fundación Rosalía de Castro e unha voz tremendamente cualificada para falar sobre a insigne poeta e escritora, inspiración de xeracións de galegas e galegos.

Anxo Angueira, escritor e poeta clave nas últimas décadas da literatura galega, é un estudoso da obra e vida de Rosalía de Castro, así como, dende o ano 2012, presidente da fundación que leva o nome da poeta. Angueira é, sen dúbida, un dos maiores coñecedores de Rosalía, pola que Oroza sentía profunda admiración, e sobre ela versará a xornada.

O FESTIVAL KEROUAC en ÉVAME:  versos de Oriana Méndez e de Malvares. 

O Festival Kerouac  leva xa dez anos definindo e dando espazo e altofalante a unha escena poética que tradicionalmente non se deixaba ver demasiado
e que agora reivindica o seu sitio no panorama cultural.
Poesía, música, performance e accións poéticas en rúas e escenarios diversos entre os que se conta a sede de Évame Oroza que o xoves, día 19, ás 19:30 horas, acolle un dos seus recitais no que poderemos escoitar os versos de Oriana Méndez e de Malvares. 

PRESENTACIÓN de "PROSAS ROTAS" de Stella Marís González Balbuena

O mércores 18 de outubro celebrarase, no local da Asociación Cultural Évame Oroza, a presentación do libro «Prosas Rotas», de Stella Maris González Balbuena. No acto, que comezará ás 20:00 horas, participarán ademais da autora; o prologuista Xesús Alonso Montero, e o editor Xabier Romero.

«Prosas Rotas» é un libro no que conviven poemas con prosas poéticas que nos introducen nas carencias, os pálpitos, a tristeza e a introspección da autora a través de bágoas que arrincan de escarpadas montañas, unha pregunta e sorpresiva resposta, unha ponte que suspira mentres outro voa de desexo, unha parede desafiuzada que nos tende a man, un búcaro de rosas resecas refugadas con pesar.

Stella Maris González Balbuena (Vigo, 1951), catedrática de francés, impartiu clases no Lycée Polyvalent «Henri Avril» en Lamballe (Francia) e nos institutos Alexandre Bóveda e Rosais 2 de Vigo ata a súa prexubilación. Conta con dous poemarios editados («Pálpito Súbito», de 2014 e «Alma Acróbata», do 2018). Dende 2020 organiza recitais presenciais en Vigo, baixo o colectivo poético «Desafiando sombras».

POETAS REFERENTES: HÖLDERLIN por Helena Cortés

O venres 13 de outubro celebrarase a segunda charla do ciclo de conferencias `Poetas Referentes´, centrado naquelas autoras e autores que influíron na vida e obra de Carlos Oroza. Nesta oportunidade teremos como protagonistas á Helena Cortés e Friedrich Hölderlin.
A partir das 19:00 horas, a profesora Helena Cortés impartirá unha conferencia arredor da obra do poeta alemán Hölderlin, achegándonos a experiencia poética hölderliniana a través dun poema que será estudado e analizado na charla. Este poema é unha das grandes elexías do autor e pertencente a súa etapa de madurez.
Helena é profesora titular de Lingua e Literatura Alemás na Universidade de Vigo, actividade que combina coa tradución e a escrita de libros. A súa labor de investigación céntrase no período clásico-romántico da literatura alemá, especialmente en Hölderlin. Trouxo ao castelán a autores como Goethe, Hölderlin, Rilke, Heidegger, os irmáns Grimm e Fontane. Así mesmo, foi directora do Instituto Cervantes en Bremen e Hamburgo, desde 2018 é membro numerario da Academia Alemá de Lingua e Literatura (Deutsche Akademie für Sprache und Dichtung), e foi galardoada coa Medalla de Oro de Goethe en 2020, e co Premio Nacional a Mellor Tradución 2021 polas súas traducións de Fausto e El Diván de Oriente y Occidente, ambos do autor J.W. von Goethe.

CON BARQUEIRA E REMADOR

O xoves, día 12 de outubro, teremos un gran evento literario no local. Trátase do recital poético multilingüe que forma parte do XII Obradoiro Internacional de Tradución Poética “Con barqueira e remador” coordinado por Yolanda Castaño, o cal se desenvolve nestes días na Illa de San Simón. Na presente edición deste obradoiro participan Kai Aareleid, de Tartu, Estonia; Xabier Cordal, de A Coruña; Jessica Zuan, de Engadina Alta (Suíza); Corina Oproae, de Tansilvania (Rumanía); Castillo Suárez, de Alsasua (Navarra), e Marta Eloy Cichocka, de Cracovia (Polonia). Durante o recital, cada poeta recitará os seus versos na lingua orixinal e escoitaremos as traducións ao galego. O recital dará comezo ás 19:30 h.

OS PERSONAXES COMO EIXOS DAS HISTORIAS

O martes día 10 comeza o obradoiro de escrita que impartirá Clara do Roxo no local. O obradoiro terá unha duración de 6 sesións, de 2 horas cada unha, e estenderase ata o día 14 de novembro, en horario de 18:00 a 20:00 horas.

Esta primeira clase será de proba e estades convidadas a asistir sen compromiso, pero se queredes anotarvos xa, aínda está aberto o prazo no correo Este enderezo de correo está a ser protexido dos robots de correo lixo. Precisa activar o JavaScript para velo.

POETAS REFERENTES: WALT WHITMAN

O ciclo Poetas Referentes dará comezo o vindeiro venres 6 de outubro coa conferencia dedicada ao autor estadounidense Walt Whitman que será impartida por Eduardo Moga. O ciclo Poetas Referentes dará comezo o vindeiro venres 6 de outubro coa conferencia dedicada ao autor estadounidense Walt Whitman que será impartida por Eduardo Moga. O escritor e crítico literario ten un profundo coñecemento da obra de Whitman, pois foi o encargado de traducir ao castelán os poemarios Hojas de hierba (2014) Canto de mí mismo y otros poemas (2019) e Yo soy el poema de la Tierra (2019). El mesmo é un poeta de longa traxectoria que conta con recoñecementos como o premio Adonáis de Poesía e o International latino Book Award.

LUGO ACOLLE A EXPOSICIÓN DO CENTENARIO DE OROZA DURANTE AS FESTAS DE SAN FROILÁN

A exposición Oroza, que celebra o centenario do nacemento do poeta galego (1923-2015), fará en Lugo a sexta parada nun percorrido que comezou alá polo mes de maio en Vigo. O martes 3 de outubro (11:30 horas) inaugurarase a mostra sobre o xenial poeta oral, que estará instalada no recinto feiral de San Froilán.

Na inauguración participarán o director xeral de Cultura da Xunta de Galicia, Anxo Lorenzo; a concelleira de Cultura de Lugo, Maite Ferreira; o presidente da Asociación Évame Oroza, Xabier Romero, e a escritora Clara do Roxo. Durante o acto, un integrante da asociación lerá un texto no que se explica como xurdiu Évame Oroza e os seus obxectivos e tamén haberá unha lectura de poemas e unha visita pola mostra.

A exposición, que arrincou en Vigo, está formada por seis cubos xigantes para exterior na que, a través de imaxes e texto, se fai percorrido pola vida e obra deste poeta oral. Posteriormente recalou en Pontevedra, Viveiro, O Caurel, Ribadavia e agora Lugo. A mostra é organizada por Évame Oroza, contando co apoio económico da Xunta de Galicia e a colaboración dos diferentes concellos.

UN RECITAL EN VARIAS LINGUAS CELEBRA O DÍA DA TRADUCIÓN NA ASOCIACIÓN ÉVAME OROZA

O vindeiro sábado 30 de setembro, ás 19:00 horas, o colectivo vigués Desafiando Sombras ofrecerá no local da asociación Évame Oroza un recital que xuntará voces e linguas variadas para celebrar con poesía o Día Internacional da Tradución.  No evento poderanse escoitar versos en xaponés, grego, inglés, alemán, francés, italiano, portugués, castelán e galego. 

Participarán na lectura Miguel Vigo, Stella Maris, Alberto Avendaño, Montse Copa, Karin Monteiro, Elisabeth Oliveira, Alicia Savaxe, Franchesca d’a Silva e Gonzalo Navaza, que presentarán unha escolma de poemas coa que queren poñer o foco no valor da pluralidade de linguas.

 Desafiando Sombras é un colectivo de poetas creado coa intención de achegar a poesía a espazos e públicos diversos. Nos últimos anos veñen realizando lecturas poéticas que atenden tanto a textos propios como a clásicos chegados de diferentes sistemas literarios. Este recital en homenaxe ao Día Internacional da Tradución vai xa pola súa terceira edición presencial, posto que as primeiras citas foron online, xa que foi nas redes onde o colectivo comezou a dar os seus primeiros pasos. A día de hoxe contan cunha longa lista de eventos que os levaron por diferentes locais de Vigo e outros puntos de Galicia.

PRESENTACIÓN DO CÓMIC “LUCIO STRADA” DE IAGO LOSADA E ALBERTO M. SOTO

O vindeiro xoves 28 de setembro, o ilustrador Iago Losada e o guionista Alberto M. Soto presentarán a súa obra Lucio Strada no local da asociación Évame Oroza. No acto, que comezará ás 20:00 horas, contarán coa presenza do editor Xabier Romero. 

Lucio Strada é un cómic en 12 capítulos ambientado nunha cidade ficticia, Vilajiche, que é un trasunto de Vigo, tanto nos escenarios como nos personaxes que circulan polas súas historias. Seguindo o seu protagonista, Lucio Strada, adentrámonos nunha trama de investigación, suspense e acción que nos leva por diversos lugares e personaxes, moitas veces reais, que forman parte da historia recente da cidade. 

A obra está publicada en dúas entregas. A primeira, de 6 capítulos, gozou de moi boa aceptación entre o público. Na cita do xoves 28 presentaranse os 6 últimos, que pechan o relato. 

Cabe sinalar que, como engadido, cada unha das entregas conta coa colaboración dunha persoa convidada que elabora unha portada alternativa. Trátase de artistas que veñen do graffiti, a fotografía, a ilustración ou o deseño. Algunhas desas colaboracións foron asinadas por nomes como Alba Freijeiro, F. Gabilondo, Felipe Carnotto, David Martínez Conde, Andrea Martínez ou José María Sánchez Macías, entre outros. 

COLOQUIO ARREDOR DO LIBRO "EN VOZ BAJA" DE ANTONIO GARCÍA TEIJEIRO 

A Asociación Évame Oroza segue co seu programa de presentacións e coloquios literarios e nesta ocasión acollerá unha charla arredor da novela En voz baja, do escritor Antonio García Teijeiro. Durante o acto acompañarán ao autor Alba Piñeiro, tradutora ao galego de diversas obras de literatura infantil e xuvenil, e a editora Arantxa Amatriaín.

En 1998, García Teijeiro publicou esta obra por primera vez en galego, daquela en Edicións Xerais, pero non foi ata agora chegou en castelán, desta vez da man de Antón García Fernández, quen encargou da tradución.

“En voz baja” é unha novela de personaxes que nos anima a entender dende o optimismo os comportamentos, por veces escuros, do ser humano. Trátase duna obra na que a literatura e a música teñen unha presenza destacada. A través do seu protagonista, o adolescente Roberto Núñez, transitamos por cancións, poemas e reflexións que o axudarán a atopar pouco a pouco a súa propia voz e o seu lugar no mundo. E  sempre en voz baixa.

A novela publicouse na primavera deste ano en Editorial Elvira e a imagen da capa é do artista Xulio García Rivas.

.

QUICO CADAVAL TRAE Á ÉVAME OROZA A CONTADA “A LINGUA A PACER”

O actor, director teatral e narrador Quico Cadaval actuará o vindeiro xoves 21 de setembro no local da asociación Évame Oroza, situada no número 5 da rúa Subida á Costa, no Casco Vello Alto de Vigo. Baixo o título A lingua a pacer, ofrecerá unha sesión de contos que recolle a esencia das contadas tradicionais: unha historia fíase con outra e leva ao auditorio mundo adiante, picando de aquí e de aló, como as vacas procuran e remoen a mellor herba, a máis gorentosa. 

Quico Cadaval é un dos referentes da narración en galego, compañeiro dunha xeración que, nos anos 90 do século pasado retomou e actualizou o xénero nunhas sesións nas que se combinaban a maneira tradicional, a épica escénica e o cabaret literario. Xunto con voces como a de Paula Carballeira, Cándido Pazó, Roger Colom ou José Campanari, entre outras, iniciou o camiño desta disciplina que a día de hoxe segue a gozar de gran recoñecemento tanto dentro como fóra das nosas fronteiras. 

Cadaval é tamén un dos nomes imprescindibles do teatro galego actual. Participou en diversas montaxes como actor e director, destacando o seu labor na dirección en compañías como o CDG e Produccións Teatrais Excéntricas, da que é fundador e na que creou espectáculos con gran éxito de público para o dúo Mofa e Befa.

Como narrador presentouse en diversos festivais de todo o mundo, recoñecido como portadore dun estilo propio, case unha denominación de orixe.

.

VIGO ES NOMBRE DE MUJER, A EXPOSICIÓN QUE RECUPERA A MEMORIA TRANS DE VIGO CHEGA AO LOCAL DE ÉVAME OROZA

A asociación Pvlse, que presta apoio ao colectivo LGTBIQ+, trae a Évame Oroza unha mostra composta por diversas fotografías a través da cal rescata e reivindica a memoria do colectivo trans na cidade de Vigo. As imaxes céntranse nas protagonistas do movemento durante as décadas dos 70, 80 e 90 nunha homenaxe ás persoas trans que abriron camiño cara a unha sociedade máis diversa.

A inauguración da mostra será o vindeiro sábado día 16 de setembro ás 12 do mediodía no local da asociación, situado no número 5 da rúa subida á Costa, no Casco Vello Alto de Vigo. Durante a inauguración falarán Fran Fernández, en representación de Pvlse, e contará coa colaboración de Carolina Smith, unha das protagonistas desta loita pola igualdade, que guiará ao público a través das imaxes compartindo as historias das pioneiras deste movemento.

A exposición pode visitarse de luns a venres ata o 24 de outubro, en horario de 16:00 horas a 20:00 horas.

.

VIVEIRO CELEBRA O CENTENARIO DE CARLOS OROZA

Viveiro, a localidade natal de Carlos Oroza, vive de forma especial o seu centenario e por iso o domingo 10 de setembro celebraranse varios actos para honrar a figura deste xenial poeta oral, organizados de forma conxunta polo Concello de Viveiro, o Seminario de Estudos Terra de Viveiro e a Asociación Évame Oroza.

O día comezará ás 12:30h, na sala multiusos do Concello, coa presentación do libro Évame, recompilatorio da súa obra, publicado por Editorial Elvira.

Ás 19:00h, unha comitiva sairá desde a Praza Maior ata a casa onde viviu o poeta na Avenida de Lourdes, acompañados polo gaiteiro David Bellas. Nesa praciña procederase a colocar unha placa realizada polo ceramista Otero Regal. O Cronista Oficial, Carlos Novo disertará sobre o autor. Posteriormente realizarase un recital coa participación do mestre e poeta Xaime Oroza e poeta do grupo Rompente, Alberto Avendaño, entre outros. Contorna ás 20:30h clausurará o acto a alcaldesa de Viveiro, María Loureiro. 

Este é un acto máis dos que se están celebrando ao longo do ano do centenario do nacemento de Carlos Oroza. Hai que lembrar que no mes de agosto estivo nos xardíns Noriega Varela a exposición Oroza, realizada pola asociación Évame Oroza e e financiada pola Xunta de Galicia, que está a dar a coñecer a vida e obra do poeta por toda Galicia.

MICROTEATRO na Praza do Abanico con PORTA ABERTA e FAUNA 113

A praza do Abanico do Casco Vello Alto de Vigo converterase este xoves 24 de agosto (20:00 horas) nun teatro ao aire libre no que poderemos gozar de dúas obras de microteatro a cargo dos grupos de teatro afeccionado Porta Aberta e Fauna 113.

Porta Aberta presentará o seu espectáculo «O velorio», no que dúas irmás, en pleno velorio, manteñen unha conversa post mortem do máis interesante, intentando pescudar a razón de como chegaron a esta situación.

A segunda obra será «Sopa de Morcego» do grupo vigués Fauna 113, na que se conta a historia dunha parella en crisis de dúas mulleres que atopan na realidade virtual un revulsivo á súa relación. 

O formato de microteatro resulta moi atractivo para o espectador/a, xa que se atopa moi preto e é capaz case de introducirse na trama. Inicialmente, o microteatro desenvolvíase en diferentes estancias dunha casa ou edificio. Cada grupo actuaba nun espazo e o público, formado por 15 persoas, era o que se ía movendo. Agora, é o revés. Hai un escenario común e son as obras as que se moven.  Historias curtas para emocionar tamén en distancias curtas.

Así, o xoves tedes unha cita coa cultura, co teatro e coa comedia ao aire libre e de forma gratuíta. Esperámosvos, a partir das 20:00 horas, na praza do Abanico, diante da asociación Évame Oroza.

OBRADOIRO DE TEATRO EN ÉVAME

Todos os luns, a partir do 4 de setembro e ata fin de ano, vaise realizar un taller de teatro para adultos (nivel principiantes). A promotora desta iniciativa é María Romano (actriz, profesora de teatro e traballadora da asociación Igualarte) que se puxo en contacto coa asociación para poder desenvolver esta iniciativa, que nos pareceu moi interesante. Así que chegamos a un acordo moi rápido e coa opción de que as e os nosos socios teñan un prezo especial polo obradoiro. O custe do mesmo será de 35 euros mensuais para a nosa masa social, mentres que para o público en xeral será de 50 euros.

As clases serán todos os luns a partir das 20:30 horas no local social de Evame Oroza e cada sesión terá unha duración de dúas horas. Ademais, a primeira clase, que se celebrará o 4 de setembro, será gratuíta.

Para máis información e para inscribirse no curso (que ten prazas limitadas) debedes escribir ao mail Este enderezo de correo está a ser protexido dos robots de correo lixo. Precisa activar o JavaScript para velo., onde María responderá todas as vosas preguntas.

Presentación de BUENO CARALLO BUENO | Mostra de pintura de José Freixanes

O mércores 19 de xullo, ás 20:00 horas, terá lugar a inauguración da mostra de pintura de José Freixanes, continuando coa programación de exposicións no local de Évame Oroza. No evento presentarase tamén o libro Bueno Carallo Bueno froito da colaboración entre o poeta Alberto Avendaño e Freixanes, publicado por Editorial Elvira. No acto estarán presentes José Freixanes, Alberto Avendaño e o editor Xabier Romero.  A exposición poderá visitarse ata o venres 1 de setembro de luns a venres en horario de 17:00 horas a 20:30 horas, no número 5 da Subida á Costa, no casco Vello Alto de Vigo

SUCESO E SOMBRA. Xornada Poético Musical

O xoves 20 de xullo ás 20:00 h, a Asociación Évame-Oroza acolle unha xornada na que versos e música de autor se xuntan para por de manifesto o poder emocionante da poesía. Baixo o título, que remite a un verso de Oroza, xuntaranse as poetas Susi de la Torre, Ania Gartner, Sabrina Portela, Montse Copa, Lola Villar, Francesca López D’a Silva e Lania Santana Pérez, que lerán versos propios en galego, portugués e castelán. A cantante, e tamén poeta Iria Medraño, porá a nota musical xunto cos cantautores Pablo Vila, Jorgelito e Pedro Román. O acto, que estará presentado pola actriz Toñi Caseiro reivindica os múltiples espazos e formatos nos que pode habitar a poesía. Por iso a organización quere levar os versos á rúa, seguindo unha idea que era fundamental no pensamento de Oroza: as rúas e prazas, como lugares cheos de auténtica vida, son o hábitat natural da cultura, nomeadamente da poesía.

A xornada desenvolverase na coñecida como Praza do Abanico, no Casco Vello Alto de Vigo, fronte á sede da Asociación Évame Oroza

"Pinturas: Encontro Buenos Aires-Vigo” de RUBÉN BORRÉ

A Asociación Évame Oroza acollerá o luns 3 de xullo (20:00 horas) a inauguración da exposición “Pinturas: Encontro Buenos Aires-Vigo” do artista arxentino Rubén Borré. Esta mostra nace da amizade entre Borré e o pintor Xavier Magalhães, xa que Magalhães ten actualmente exposta a súa obra no local e decidiu ceder a primeira planta á Borré para que poida acoller os seus cadros.

Precisamente por iso, no acto de inauguración da mostra estará, ademais do propio autor,  o tamén pintor e amigo Xavier Magalhães, e o presidente da asociación Évame Oroza, Xabier Romero.

Rubén Borré é un artista completo e comprometido co seu tempo. É pintor, debuxante e escultor, e realizou xa 70 mostras individuais e máis de 200 colectivas no seu país e no estranxeiro, sendo precisamente España un dos países onde o seu labor é máis recoñecida.

A PEGADA DE GALICIA EN CUBA

O xoves 22 de xuño ás 19.30 horas, a Asociación Évame-Oroza organiza un coloquio sobre a historia compartida entre os pobos cubano e galego, enfatizando a situación das mulleres de ambos países. O encontro será con Juana Caridad Fernández, Presidenta da Agrupación de Sociedades representativas de Municipios e parroquias de Galicia en Cuba, Arantxa Fernández Crespo, presidenta da Cátedra Neira Vilas de Lingua e Literatura galegas da Universidade da Habana, e José Luis Ansedes, promotor da homenaxe a Andrea López Chao, mestra mindoniense, e a Sociedade “Hijas de Galicia”, que se celebrará en Mondoñedo entre os días 30 de xuño e 3 de xullo. Presentará e moderará o coloquio a xornalista Ana Baena.

"As Cunchas Baleiras" de BRANCA NOVONEYRA

O xoves 29 de xuño recibimos no local da Asociación Évame oroza a Branca Novoneyra, que estará acompañada do artista Antón Patiño, a poeta Oriana Méndez e o editor de Chan da Pólvora Antón Lopo. Terán unha conversa arredor do último poemario de Branca, titulado As cunhcas baleiras que vén de editar Chan da Pólvora.

As cunchas baleiras recolle poemas que Branca Novoneyra escribiu ao longo da última década, constituíndo unha especie de antoloxía na que aparecen versos que, ao seu xuízo, resistiron a peneira dun proceso de escrita moi amplo. Á poeta non lle interesa producir libros, senón concentrar a palabra, probala no tempo e, se é verdadeira, conservala. É o regreso á poesía despois de moito tempo de silencio, experiencias e reflexión.
As liñas centrais deste libro son persoais, pero non é unha biografía, senón que se transmite o particular a través do imaxinario colectivo. Volver camiñar despois dunha longa enfermidade ou a acción política son algunhas das ideas que atravesan a obra.

MELIDE  por Fundación Igual Arte

O venres 16 de xuño, ás 18:30 horas estarán no local as compañeiras e compañeiros da Fundación Igual Arte, que dende 2002 traballa para que as persoas con diversidade funcional teñan acceso a expresarse de maneira artística. Nesta ocasión presentarán a performance teatral Melide, baseada na novela do mesmo nome de Reka Refojos. As persoas que a interpretan son Rubén Barciela e María Romano e a música é orixinal de Fundación Igual Arte. “Melide” é unha novela rápida e intensa, desas das que non podes apartar a vista. Unha obra dinámica na que se fai unha biografía da nosa sociedade, coas súas cousas boas e as malas. Unha novela por veces negra, por veces rosa, por veces azul como o mar. Está editada por Editorial Elvira.

Presentación do libro FENÓMENO FAN de CLARA PINO e XAVIER MAGALHÄES. Mostra XAVIER MAGALHÄES

O martes día 13, ás 20:00 horas inaugúrase a mostra do pintor Xavier Magalhães, segunda do ciclo de exposicións da asociación. Durante o evento terá lugar a presentación do libro de poemas Fenómeno Fan de Clara Pino, obra na que se recolle a obra gráfica desta mostra, editado por Editorial Elvira. A mostra poderá visitarse ata finais de xullo, en horario de tarde.

Fenómeno Fan é un mergullo no universo literario e pictórico de Clara Pino e Xavier Magalhäes. Os dous artistas fusionan e consolidan unha relación artística e de amizade chea de colaboracións desde o ano 2007. A partir do fío condutor tan globalista e alienante que supón o suceso «fan» en moitas expresións artísticas, autora e autor extrapolan e fían outras temáticas imprescindibles na nosa sociedade actual, conformando un corpus que se xesta no confinamento e agora ve a luz. Atopámonos cun libro cheo de beleza e introspección no que o público gozará de cada páxina, tanto polo seu compromiso coma pola interdisciplinariedade entre as artes tan necesaria nos nosos días.

Conversa con ODETTE MAGNET

Odette Magnet é xornalista, escritora e activista polos dereitos humanos. Foi agregada de prensa nas embaixadas de Chile en Washington, D.C. e Londres e agregada de prensa e cultura no Consulado General de Chile en La Paz, Bolivia.

A súa carreira xornalística comezou nos anos duros da dictadura de Augusto Pinochet e forxouse no medio da violencia política que deixou pegada na súa historia persoal, marcada polo secuestro da súa irmá María Cecilia Magnet e o seu cuñado, Guillermo Tamburini, á man de militares arxentinos na súa vivenda de Bos Aires a madrugada do 16 de xullo de 1976. Os dous son parte das corenta víctimas chilenas que deixou a Operación Cóndor.

A partir dese momento Odette consagrou o seu traballo a seguir casos de dereitos humanos. Durante case dez anos foi redactora da revista Hoy, que se definía polos principios do xornalismo libre, onde cubría temas relacionados coa política e os dereitos humanos. Saltando os valos da censura, nas súas páxinas facíase denuncia dos numerosos e sucesivos casos de violencia e violación dos dereitos básicos por parte da dictadura.

Odette define a palabra como arma de resistencia, un instrumento contra o silencio e a invisibilidade, unha maneira de conxurar todo a inxustiza e terror. Na súa primeira novela, titulada Arena Negra, poden atoparse algúns destes temas que son fundamentais na súa escrita.

OROZA 1923 -2023 Centenario do poeta Carlos Oroza

Presentacion do libro OCÉANO OROZA, de Antón Patiño e da reedición de ÉVAME, de Carlos Oroza

No acto estarán presentes Antón Patiño, autor, o editor Xabier Romero e o xornalista e escritor Ramón Rozas.
En Océano Oroza o pintor Antón Patiño establece un diálogo cos poemas de Carlos Oroza, entendendo a súa poesía como unha obra total, unha obra na nos podemos somerxer. De aí nace un sentimento oceánico, unha plenitude que provén da desorde e da rotación dos sentidos. A poética de Oroza amplía a linguaxe, crea palabras novas, descubre ritmos inéditos no idioma.
Évame é o volume no que se recolle a poesía completa de Carlos Oroza, despois dunha minuciosa revisión con relación á edición anterior. A nova edición, que se abre cun prólogo de Antón Patiño, contén ademais un poema inédito e un glosario escrito por Branca Novoneyra, así como material documental e imaxes que veñen completar a experiencia lectora

Presentación da novela gráfica POR CULPA DE UNA FLOR de MARÍA MEDEM

O acto será moito máis que unha presentación. Trátase dunha xornada de festa e sinatura que comezará ás 16:00 h coa inauguración dunha mostra dos traballos de Medem. Acto seguido terá lugar a presentación da novela, na que estará acompañada de Óscar Raña, e a sinatura de exemplares. 
Ás 20:00 horas comezará o concerto de “Los cuatro amigos” e a partir das 20:30 haberá cea, da man de Hugo Bocanegra, durante a que se presentará o fanzine recetario de Hugo Espacio e María Medem. O menú da cea é vexetariano e sen glute, e ten un custe de 5 euros. Para acceder a ela prégase que se faga a reserva previa no enderezos: Este enderezo de correo está a ser protexido dos robots de correo lixo. Precisa activar o JavaScript para velo.

Presentación do poemario CON ESTA HOZ de SAMUEL MERINO.

El poeta Samuel Merino presenta su último poemario que acaba de ver la luz en Disbauxa Editorial (Barcelona). En el acto estará acompañado de las poetas Silvia Penas y Blanca Trigo.

DESAFIANDO SOMBRAS recita a Carlos Oroza.

O Grupo Poético Desafiando Sombras sumase as homenaxes a Carlos Oroza lendo poemas do autor acompañados da música de Santiago Ferragud.

VIDEOCONFERENCIA E RECITAL poético-musical

Actuación do dúo poético-musical Cinta Adhesiva (formado pola poeta Silvia Penas e o músico Jesús Andrés Tejada) que se abrirá coa conexión en directo, dende Nova Iorque, de Marina Oroza, quen se atopa alí participando do Festival Kerouack